NASDAQ OMX Iceland hf. (Kauphöllin) hefur ákveðið að taka skuldabréf útgefin af Glitni banka hf. úr viðskiptum eftir lokun viðskipta þann 5. júní nk. Ákvörðunin er tekin með vísan til ákvæðis 8.5.1 í reglum fyrir útgefendur fjármálagerninga í Kauphöllinni, þar sem félagið hefur fengið heimild til greiðslustöðvunar samkvæmt ákvæðum laga nr. 129/2008, um breytingu á lögum um fjármálafyrirtæki. Almennt leiðir greiðslustöðvun ein og sér ekki til þess að fjármálagerninga beri að taka úr viðskiptum. Af lögum nr. 44/2009 um breytingu á lögum nr. 161/2002, um fjármálafyrirtæki, með síðari breytingum, verður ekki annað ráðið en að jafna verði stöðu þeirra fjármálafyrirtækja, sem fengið hafa greiðslustöðvun, efnislega við gjaldþrot.