Glitnir selur breytanleg skuldabréf fyrir 15 milljarða

Góð eftirspurn var eftir breytanlegum skuldabréfum Glitnis í
skuldabréfaútboði bankans sem lauk í gær.  Heildarfjárhæð útgáfunnar
var 15 milljarðar króna en bréfin voru seld í lokuðu útboði til
innlendra fagfjárfesta sem hófst í síðustu viku.  Útgáfan telst til
eiginfjárþáttar A og styrkir þannig eiginfjárhlutfall Glitnis
umtalsvert. Markaðsviðskipti Glitnis voru umsjónaraðili útboðsins.

Lárus  Welding,  forstjóri   Glitnis,  er   ánægður  með   niðurstöðu
útboðsins.  "Við  lokuðum   þessu  útboði  á   miklum  óvissutíma   á
fjármálamörkuðum sem  endurspeglar traust  fjárfesta á  starfsemi  og
skuldaraáhættu  Glitnis.  Þessi   skuldabréfaútgáfa  var  sniðin   að
íslenskum  fagfjárfestum  sem  þekkja   bankann  og  þá   sérstaklega
lífeyrissjóðunum", segir Lárus.

Skuldabréfin breytast að fimm árum liðnum í hlutabréf í Glitni  banka
hf. Útgáfa skuldabréfanna  og heimild til  hækkunar hlutafjár er  háð
samþykki hluthafafundar. Hluthafafundur verður haldinn  miðvikudaginn
19. mars 2008 kl. 9:00 í höfuðstöðvum Glitnis banka hf.

Nánari upplýsingar veitir:

Már Másson, forstöðumaður kynningarmála, mar.masson@glitnir.is
sími:   +354 440 4990 GSM:  +354 844 4990

Vala Pálsdóttir, Forstöðumaður kynningamála,
vala.palsdottir@glitnir.is.
sími: +354 440 4989, farsími: +354 844 4989